أبوزيد .. قهوة سكة حديد محطة كريمة ..قطار الشمالية و الزمن الجميل
أبوزيد .. قهوة سكة حديد محطة كريمة ..قطار الشمالية وذاك الزمن الجميل
الشعراء والفنانين ..منهم الشاعر حسن الدابي وحميد محمد الحسن شربوا الشاي والقهوة عندنا..
كريمة .. عبدالوهاب السنجك
محطة سكة حديد كريمة هي من المحطات التي يجب التوقف عندها طويلا ، بالرغم من تغير المكان في كل الاتجاهات غير ان قهوة سكة حديد محطة كريمة مازالت تستقبل زبائنها لما لها من مكانة خاصة لاهل الشمالية ..فهي المحطة التي ولدت مع انطلاق السكة حديد ابان الحكم الانجليزي في رابطا ببقية انحاء السودان .
قهوة سكك حديد كريمة ..عمنا ابوزيد موسي محمد علي ..
يحكي ليقول ..زمان السكة حديد ..هي الحديد القطار له محبة خاصة لاهلنا في الشمالية لانو مافي سفر من غيرو الا عن طريق اللواري ..السفنجة والهوستن ودي مع الرمال عايزة ايام عشان تصل هنا شايلة الركاب ولمن ترجع تشيل معاها المحاصيل كان تمر ولا قمح .
@@ القطر كان يسافر من كريمة يومي الاحد والاربعاء ويجينا من الخرطوم الخميس والاربعاء تلقي المسافرين والمودعين في المحطة شايلين الشنط والطرود وزمان كان في شنط حديد الصفيح يسموها (المجوز) والقفف طبعا السكة حديد ناقل قليل التكلفة من حيث تذكرة السفر ونقل البضائع
@@ كنا بنشتغل ونفتح القهوة من الصباح مع صلاة الصبح لغاية الساعة تسعة ليل ونتقطع شوالين سكر والناس تخت عندنا الامانات كان قروش ولا شنط وطرود والحمد لله ما حصلت لينا اي مشاكل الناس خايفين الله .
@@ كانت كباية الشاي بقرش واحد بس لكن القروش ما كانت قروش .
@@ واسع قل العمل وانهارت السكة حديد وغاب القطر ونام ناظر المحطة وناس الدريسة وضاع التابلت ومشي معاهو النقل النهري .
@@ طبعا القطر كان بشيل الركاب في عربات منها القمرة لكبار الموظفين واسرهم ودرجة اولي وثانية حتي الدرجة الرابعة .. وفي عربات خاصة بتشيل التمر ايام موسم الحصاد من ديار الشايقية واهلنا الدناقلة اضافة لنقل الماشية والمواد البترولية والمياة للمحطات والسندات الصغيرة .
@@ طبعا توقف قطارات السكة حديد والنقل النهري ومصنع تعليب الفواكهة في كريمة اثر علينا كثير لكن نحمد الله النفس طالع ونازل وراضين بالرزق .
@@..من المشاهير والشعراء والفنانين المترددين علي القهوة حكمدار سكة حديد كريمة محمد احمد الزرقاني والشاعر حاتم حسن الدابي وحميد محمد الحسن والشاعر خالد شبوري واحمد سليمان طه وكمال حسن (المقل) والفنان معاوية المقل ولعيبة كرة القدم من الاندية الرياضية بكريمة ودنقلا.
@@..اقول ليك ..لا بديل للسكة حديد الا السكة حديد ..وشكرا ليكم ياناس صحيفة (اخر خبر ) ومرحبا بيكم في اي وقت القهوة قهوتكم والمكان مكانكم وكريمة بلدكم .
