✍️ عبدالوهاب السنجك .. يكتب: (خمة نفس).. دورة تدريبية خاصة ..!!

عبدالوهاب السنجك يكتب (خمة نفس).. دورة تدريبية خاصة
القائد يعلن الهبوط بسلام على المدرج المخصص أبواب الناقل تفتح لهم، المضيفة ترسم إبتسامة الوصول للقادمين..
همس في أذنه.. ياخي معقول الولاية تفور كدا، انا جبتو معاي عشان يساعدني بقى لي وجعة، انا مش عارف الزول طول عمرو ومدة خدمتو ليه ما اتعلم حاجة،
والله ياريس نحنا ذاتنا مش راضين وكل حاجة مش عاجباهو وبصراحة هو عندو عجرفة شديدة..
طيب انا اعمل شنو!!
اقول ليك بصراحة احسن تتخلص منو ما يحيب ليك كفوة ومصيية أكبر من دي واحسن نقعد مع الجماعة ديل لأنو خلاص الزمن ماشي والعام الدراسي خلص.
عمال صالة القادمين في حالة من الحركة.. صياح واصوات من هنا وهناك..
الحقائب تترنح على خط الدوران الجميع يتابع تلك الحركة.
 اخذ مقعدا بعيدا في انتظار اتمام بعض الإجراءات.
ضابط المراسم يقف من أمامه ممسكا ببعض الأوراق الرسمية.. العربية جاهزة والجماعة في انتظارك براا
مسح على جبينة بمنديل ورق أبيض بعد أن وضع النظارة من امام عينة، وبدأ يخطو ببطء.
شريط الأفكار يلف بعقله، عدة قضايا في انتظار قدومه من الخارج.. شكاوى وامتعاض وغضب، تحتاج لضبط النفس والتفكير بهدؤ.
الفارهة تقطع المسافة وهي تقفز بسرعة من فوق حواجز ومطبات المسعودية وودالترابي والحصاحيصا وفداسي.. جنبات الطريق سيطرت عليها مزارع المسكيت واكياس النايلون.
ارخى جسده ثم اغمض عينه بعد ان لفحته برودة هواء مكيف الفارهة ليعيش في زمن آخر بعيدا عنهم
التوقف على مسافة ليست ببعيده عند إحدى البوابات،
رجال بزي عسكري وآخرين مدني يحومون من حول العربة…يقول.. دي عربية الوالي انتوا ما بتعرفوها ولا شنو!! افتحوا ليها تمر..
صوت آخر ياجنابو هو كان وين اليومين ديل والولاية مولعة.
ثان يقول.. ما كانوا في دورة تدربيية خارج البلد،.. اخخخ يابلد الما عندك وجيع…دورة تدريبية خاصة (خاصة)
 الحمد الله وصلنا بسلام.. عمال القصر في حركة استقبالا للقادمين.
 مد اليه يده ببرود وهو يقول سرا.. عملتها مش كدا.. زعلت الولاية كلها انت ما عارف ديل اكبر قطاع ومعاهم اولياء الامور ليه كدا بس!
يحادث ضابط المراسم.. مش عايز زول يدخل علي عايز ارتاح شوية
 رزم من ملفات التقارير الرسمية تحتاج للبت فيها فورا وبالاخص التقارير الامنية والمالية التي من اهمها مرتبات ومستحقات العاملين بالتعليم وفك الاشتباك الذي اخذ طريق التحدي والتهديد مابين الاطراف لتتبني الصحافة القومية والالكترونية الازمة من عدة زوايا…
ثم ماذا بعد!! قد يترجل الرجل حتى نلملم الأحداث ونضمد الجراحات.

(خمة نفس)
بعد عودتكم سالمين من دولة اثيوبيا حدثونا عن تلك الرحلة والدورة التدربيبة.
(خمة نفس)
من أين سيتم سداد القيمة المالية لسفلتت وتاهيل وصيانة (61.5) كيلو متر من طرق الولاية اهي صفقة من تحتها (صفقة) تمت عن طريق لاعب ذكي… وان كان ظني يقول بأن (دريم لاند) ستكون هي الساحة الأساسية ذلك!!!

سنرى..